Petrit Vasili hodhi sërish akuza ndaj ambasadorëve të huaj që kanë kritikuar presidentin Meta për emërimet në Gjykatën Kushtetuese. Tejet i ashpër në fjalët e tij, Vasili akuzon disa seli diplomatike në vendin tonë se ”po bëjnë avokaturën kriminelëve dhe atyre që duan të kthejnë në leckë për këmbët Kushtetutën e vendit tonë”. Vasili u drejtohet diplomatëve të huaj nëse homologët e tyre shqiptarë në vendet e tjera të botës do të ndërhynin në punët e brendshme të atij shteti të huaj dhe të gjykonin për Kushtetutën e atij vendi. Nëpërmjet ironizimit, Vasili shton se në vendin tonë po shfaqet solidaritet ndaj gishtit të mesit duke iu referuar ofendimit që ambasadori i OSBE-së në vendin tonë Berndt Borchardt u bëri banorëve të Astirit gjatë një proteste të tyre para Drejtorisë së Policisë së Tiranës. “Ka mjaft diplomate burra dhe gra te nderuar, qe e kryejnë siç duhet dhe me integritet detyrën e tyre të përfaqësimit. Por ka edhe disa diplomate të tjerë, të cilët shqiptarët po i shohin teksa shfaqen si solidare të gishtit”,-tha z.Vasili.